Internet Inapatika Bure Sasa Sinza!

MANISPAA YA KINONDONI YAZINDUA HUDUMA YA BURE YA INTERNETI KWA WiFi KWENYE KITUO KIPYA CHA DALADALA CHA SINZA

Dec 13, 2014

theNkoromo Blog, Kinondoni
Manispaa ya Kinondoni, jijini Dar es Salaam, imedhihirisha jitihada zake za kwenda na wakati katika huduma zake, baada ya kuamua kutoa huduma ya bure ya mtandao wa intrenet wa WiFi kwenye Kituo kipya cha Mabasi cha Sinza, jijini Dar es Salaam.

Akizindua huduma hiyo, jana, Meya wa Manispaa ya Kinondoni, Yussuf Mwenda alisema, mtandao wa WiFi umeunganishwa kwenye kituo hicho kupitia mkongo wa mawasiliano kupitia Kampuni ya Simu Tanzania (TTCL).

Mwenda alisema, mtandao huo utakuwepo usiku na mchana na kila mwenye kompyuta au simu zenye uwezo wa kunasa Wi-Fi ataona katika simu au kompyuta yake akitaarifiwa kuwepo mtandao wa bure wa KMC_FREE WiFi.

Alisema, mdau atakachofanya ni kujinga bure na kuendelea kupata taarifa mbalimbali zikiwemo za tovuti ya serikali na ya Manispaa hiyo ya Kinondoni na nyingine zote atakazotaka.

Mwenda alisema, baada ya kuweka mtandao kwenye Kituo hicho, mwakani Manispaa hiyo itaweka mtandao huo wa WiFi kwenye Kata zote 34 za Manispaa hiyo.

Alisema, mradi huo wa WiFi umegharimu sh. milioni 21, na Manispaa hiyo itakuwa ikiendelea kulipia huduma hiyo sh. milioni 2 kila mwezi ambazo itakuwa inalipa kwa mkupuo kwa mwaka.

Kuzinduliwa kwa huduma hiyo, kumeifanya Manispaa ya Kinondoni kuwa ya kwanza nchini kote, na pengine hata Afrika Mashiriki, kutoa huduma hiyo bure tena bila kutumia namba ya siri.

Mwandishi wa habari hii alishuhudia huduma ya aina hii kwa mara ya kwanza alipotembelea nchini China, ambapo WiFi inapatikana bure kwenye simu hata ukiwa barabarani.

Mrembo Auwawa Dar!

Sijui na sikuwepo lakini baada ya kusoma hii habari niliona kama hao waliomwua mrembo, Tina Athumani (25), walitumwa kufanya hivyo! Mnaonaje wadau?

**************************************************************
Kutoka ippmedia.com

27th August 2009

Mrembo mmoja anayefahamika kwa jina la Tina Athumani, 25, mkazi wa Jijini, ameuawa kikatili na watu wasiojulikana baada ya kuvamiwa usiku na kucharangwa mapanga na kisha mwili wake kuachwa mbele ya nyumba anayoishi.

Kamanda wa Mkoa wa Kipolisi Kinondoni, Mark Kalunguyeye, ameiambia Alasiri leo asubuhi kuwa tukio hilo limetokea usiku wa kuamkia leo, majira ya saa 7:00, pale katika eneo la Kunduchi Salasala ambako ni nje kidogo ya Jiji.

Kamanda Kalunguyeye amesema kuwa mwanadada huyo, amekutwa na umauti baada ya kukubali wito wa kutoka nje ambako alikuwa amesikia mayowe na hivyo kutaka ajue kinachoendelea.

Akasema, mara baada mwanadada huyo kutoka nje, ndipo alipokumbana na watu watatu ambao walimvuta pembeni ya nyumba na kuanza kumcharanga mapanga, pasi na sababu za kufanya hivyo kufahamika.

Hata hivyo, watu hao ambao dhamira yao haikufahamika, waliuvuta mwili wa marehemu huyo pembezoni mwa nyumba yake na kuutelekeza hapo na kisha kutokomea kusikojulikana.

Kamanda Kalunguyeye amesema hadi sasa, Polisi wanaendelea na uchunguzi zaidi ili kuweza kuwapata wauaji na hatimaye kuwafikisha kwenye vyombo vya sheria.

Acheni Tabia Mbovu!!!

Nami nakemea vikali hiyo tabia ya wanaume kujisaidia hapa na pale bila hata kujali nani anapita au watoto watacheza hapo!

*******************************************************************************

DC akoromea Wanaosumbua wenzao kwa Mikesha

2008-04-08

Na Abdul Mitumba, Magomeni

Mkuu wa wilaya ya Kinondoni Jijini, Kanali Mstaafu Fabian Massawe, ameagiza watu wote wanaokesha wakipiga na kucheza muziki wa rusha roho na aina nyingine za muziki kwa sauti ya juu kiasi cha kuwasumbua wengine wakome kufanya hivyo na kwamba kuanzia sasa wawe wakiburuzwa kortini kwani wanavunja sheria za nchi.

Kadhalika, DC Massawe amechukizwa na tabia ya wanaume wengi kujisaidia aja ndogo kila sehemu akisema ni baadhi ya dalili za kuporomoka kwa maadili miongoni mwa jamii. Bw. Massawe ameyasema hayo wakati wa mkutano wake mmoja na wananchi wa Kata ya Ndugumbi hivi karibuni.

Mkuu huyo amesema sheria za namna watu wanavyoweza kufanya sherehe majumbani mwao na hata zile zinazoelezea utaratibu wa shughuli za starehe ziko wazi na kila mmoja anapaswa kuzifuata. Akasema kamwe hairuhusiwi watu kukesha wakicheza muziki usiku kucha, tena kwa sauti ya juu kiasi cha kuwasumbua wengine.

Mbali na hayo, DC Massawe pia alikemea tabia ya baadhi ya watu wanaotiririsha maji machafu na kinyesi katika mifereji ya mvua. ``Matukio yote hayo ni mwanzo wa matatizo katika jamii. Kupiga muziki usiku kucha katika makazi ya watu ni tatizo linalokemewa kila siku na ninasisitiza kuwa sasa sheria zifuatwe... kujisaidia ovyo mitaani ni aibu nyingine ambayo jamii inapaswa kuikemea ili kujenga kuwa na kizazi kilichostaarabika,`` akasema DC Massawe.

Agizo la Kanali Massawe limekuja kufuatia baadhi ya wananchi kutoa kero mkutanoni hapo, ambapo kero iliyotawala mkutano ni tabia ya baadhi ya watu kukesha wakipiga muziki katika makazi ya watu.

SOURCE: Alasiri