Bwana Arusi achinjwa Dar

Jamani, mbona mauaji yanazidi Dar? Wivu kitu kibaya sana. Mola ailaze roho yake mahala pema peponi. Amin.

***************************************************

Kutoka ippmedia.com
Bwana harusi Dar achinjwa!

2008-09-02
Na Mwandishi Wetu, Jijini

Mwanaume mmoja anayedaiwa kuwa mbioni kufunga ndoa wiki hii ameuawa kinyama baada ya kuchomwa kisu na kisha mwili wake kukutwa kandoni mwa barabara.

Taarifa ambazo Alasiri imezipata toka kwa baadhi ya waliodai kuwa ni mashuhuda wa tukio hilo, zinadai kuwa tukio hilo limejiri mishale ya saa 4:00, usiku wa kuamkia jana na kwamba marehemu ametambuliwa kwa jina la Nassoro Shomari.

Taarifa hizo zinadai kuwa bwanaharusi ni dereva taksi aliyekuwa akifanya shughuli zake katika Kituo cha Sinza Madukani Jijini.

Wanadai mashuhuda hao kuwa mwili wa bwanaharusi huyo mtarajiwa ulikutwa katika eneo la Tandale, kandoni mwa njia ya kuelekea Kijitonyama.

Aidha, taarifa hizo zinadai kuwa mmoja wa wale wanaotuhumiwa kufanya mauaji ya dereva taksi huyo ni mwanamke mmoja aitwaye Aisha, anayedaiwa kuwa ni mpenzi wa zamani wa marehemu.

Wakieleza zaidi, wanadai wasimuliaji kuwa chanzo cha kuuawa kinyama kwa dereva taksi huyo ni kisa cha kimapenzi, hasa kutokana na ukweli kuwa wiki hii alikuwa afunge pingu za maisha na mwanamke mwingine na kuwatosa wengine aliowahi kuwa nao hapo kabla.

Wanadai wasimuliaji kuwa kabla ya uamuzi wake wa kutangaza ndoa, marehemu aliwahi kuwa na uhusiano na mwanamke mmoja pale Tandale, jirani na njia ya kuelekea Kijitonyama.

Wanadai kutokana na utamu wa penzi lao, marehemu akafikia mahala pa kujifunga mbele ya mwanamke huyo, kwa ahadi kwamba atamuoa.

``Na tena ndiye aliyempangia chumba hapo Tandale... na alikuwa akimhudumia kwa kila kitu kiasi kwamba mwanamke wa wenyewe alijua kuwa yeye ndiye yeye tu... hakuna mwingine zaidi yake,`` akadai mmoja wa wasimuliaji.

Inadaiwa kuwa licha ya kuwa na ahadi ya kumuoa mwanamke huyo, marehemu alikuja kughairi na badala yake akatangaza kufanya mipango ya ndoa na mwanamke mwingine.

Hata hivyo, inadaiwa kuwa zikiwa zimebaki siku chache kabla ya harusi yake wiki hii, ndipo marehemu alipochepuka kidogo na kwenda nyumbani kwa mpenziwe wa zamani.

``Akiwa huko, haieleweki ni kitu gani hasa kilimkuta... lakini mwili wake ukakutwa kandoni mwa njia ukiwa umechomwa visu,`` akadai mmoja wa watu waliodai kuwa ni mashuhuda.

Kamanda wa Mkoa wa Kipolisi Kinondoni hakupatikana ili kuzungumzia tukio hilo la kusikitisha.

Baadhi ya maaskari polisi wameiambia Alasiri kuwa ni kweli kuna tukio la mwanaume kuuawa kwa kuchomwa visu, na ambalo limejiri mishale ya saa 4:00, usiku wa kuamkia jana.

Hata hivyo, wamesema mwanaume huyo ni dereva wa daladala aina ya DCM linalofanya safari kati ya Mbagala na Sinza, likiwa na namba za usajili T 223 AUS.

Wanadai askari hao kuwa juhudi za kumsaka mtuhumiwa Aisha zinaendelea, kwani anadaiwa kutimka baada ya kujiri kwa tukio hilo.

SOURCE: Alasiri